📝الإعلامي حسن علي إهداء لهذه السيده العظيمه وأتمنى أن تحصل على جائزة الأم المثاليه لهذا العام
هي الخريجة الحقيقيه و البطل الحقيقي ❤
اللي عملته معانا في العشر سنين اللي فاتوا ممكن نقول عليه واحدة من أنجح قصص الكفاح والنجاح❤
ولو فضلت اكتب واحكي من دلوقتي لغايه ما عمري يخلص مش هقدر اوصف ولو جزء بسيط من اللي عملته.
مش ممكن انسى يوم ما والدي الله يرحمه توفى من سنين -الله يرحمه- وهيا بتتسلم مسئولية ٣ اولاد اكبرهم كان ١٢ سنه , ٣ اولاد قضوا حياتهم فالغربه وميعرفوش كتير عن بلدهم .
مش هنسى انها بدأت من الصفر في مصر بعد ما تعيينها الحكومي راح بسبب السفر ..بصت لقت ان مفيش اي شغل ليها ف مصر غير المدارس الخاصه باقل القليل ووالدي ملوش معاش لانه كان فالسعوديه ومعظم الفلوس اللي حوشها اتصرفت ع علاجه.
مش هنسى يوم ما قالتلنا انا مش عايزاكم تحسوا ابدا ان انتوا عايشين ف مستوى اقل من السعودية وهحاول على قد ما اقدر ما احسسكمش بكدة.
مش هنسى انها عمرها ما طلبت من حد مننا ينزل يشتغل وكان اهم حاجه عندها هوة اننا نزاكر ونركز ف مستقبلنا ولما كان حد يعرض كانت دايما تاخد الموضوع بهزار وتقولنا انتا انزل اقف فصيدليه وانتا اعمل كذا وبعدها تضحك و تقولنا انا اهم حاجه عندي هوة انكم تحققوا حلمي وحلم ابوكم وتدخلوا كليه قمة وتجيبوا اعلى المجاميع .
مش هنسى كميه المرات اللي جات على نفسها عشان محدش فينا يزعل ولما حد مننا بيزعل تقعد تنكش فيه وتهزر معاه لغايه ما يفك وكتير بتبدأ هيا بالصلح.
مش هنسى وهيا بتقولي يا حسام خد بالك من مزاكرتك وسيبك من الانشطه والتدريبات دي.. وقتها قلتلها يا ماما انا عايز ابقى مختلف و اعمل حاجه بحبها وعايز اطور نفسي واتغير ..وبدات تؤمن بيا واحدة واحدة وبقيت من اكتر الناس اللي بتشجعني وتدعمني في دة .
مش هنسى دموعها يوم نتيجه الثانويه وهيا بتشوف ثمرة تعبها قدامها .
مش هنسى اي تعب تعبتيه علشانا, مش هنسى اي دموع نزلت على تعب حد فينا , مش هنسى فرحتك بنجاحاتنا وابتسامتك.
طول عمرها شغاله فالظل عشان تلمعنا وتخلينا احسن ناس قدام الناس ❤
انا لحم كتافي وكل خير انا فيه بعد ربنا فهوة عشان الست دي امي ..الست اللي قامت بدور الاب والام على اكمل وجه وبقا عندها ٣ دكاترة فكلية طب سوهاج ❤
والنهاردة انا خريج كليه طب سوهاج بتقدير جيد جدا الحمد لله❤
*يشهد الله اني دايما بفتخر بيها ودايما بقولها انا ببقى مبسوط وانتي ماشيه جنبي وفخور كدة ويشهد الله اني بتكلم عنها دايما ..بيبقى نفسي الدنيا كلها تعرف الست دي عملت ايه❤
*********************************************
كان نفسي اعمل فيديو واحكي فيه بس الكلام وانا بكتبه كبوست مسكت دموعي كذا مرة والله ..وانا بكتب البوست دة ولأول مرة بطلب ان حد يشيرلي بوست شخصي ..انا طالب من اي حد يشوف البوست دة يشيره عشان الناس كلها تشوفه وانا عامل بلوك للاكونت بتاعها ومش هفكه غير بعد يومين عشان تشوف الناس كتبت ايه.. هعتبر البوست دة والكومنتات اللي عليه هدية بسيطه لام كرست حياتها عشان ولادها وبس❤