📝كتب الإعلامي حسن علي
القصه كامله عشان الناس تعرف.
هو الحاكم الفعلي لمنطقه كينيا وأوغندا، أكثر بقاع الأرض شهرةً بالأسود، حكمها لمده ١٢ سنة، أطول فترة حكم ذكر بالغ لزمرة أسود في التاريخ (في العادي الأسد القوي إللي شايف نفسه، ممكن يسود الزمرة لثلاث أو خمس سنين بالكتير) أما مع سكار فالوضع مختلف!
سكار أول أسد يجند اخواته معاه في نفس الزمرة، "سيكيو" و"موراني" بنفس الحق ونفس السلطه تقريباً. سمح لهم يعيشوا ويتجوزوا ويخلفوا في وجوده - وده ضد علم السلوك الحيواني عامة - فلما كان بيهجم على المجموعة أي حيوان، كان إللي بيحارب ٣ ذكور مش ذكر واحد، ودي حاجه لا حصلت ولا هاتحصل تاني.
سكار دافع عن أرضه قصاد ١٣٠ أسد تقريباً! أخرج مجموعة تماسيح كاملة من منطقته عشان افترسوا شبل.. ملك يا جماعة ..بنتكلم عن ملك مش حيوان!
عمره ما افترس انسان، رغم دخولهم المستمر منطقته! قتل في حياته حوالي ٤٠٠ ضبع لوحده بانيابه وأسنانه -من غير اخواته- الأسد الوحيد المعروف المنتصر على ذكر فرس نهر بالغ، في معركه راجل لراجل!
و هو صاحب الفيديو الشهير إللي كان ضد قطيع ضباع بالليل علي طريق سريع، واخواته انقذوه في آخر لحظه، ودي كانت آخر مرة يكسر قواعده الخاصة، ويهاجم بشكل منفرد زي باقي الحيوانات.
سكار خسر عينه في ٢٠١٦ في معركه اسمها Pride of the pride، أو (كرامة الزمرة)، حارب فيها مع اخواته ٦ أسود، قتل منهم لوحده أسدين، والباقي كلوهم اخواته!
في ٢٠١١ اشتبك مع أسد أصغر منه ب ٣ سنين، وقده مره ونص في الوزن، اسمه "جرابي"، كل كينيا كانت متوقعه إن جرابي هياخد العشيرة، وحتي اخوات سكار مش هيسدوا!
سكار خسر حتة من رجله لكن ماخسرش المعركة، واحتفظ برأس "جرابي" أسبوعين قبل ما يرميها، زي الملوك كده لما كان بيعلقوا أعداءهم علي سور المدينة في رسالة واضحة صريحة:
"إللي هايتهور هايتعور"
المهتمين بالحيوانات في العالم كله اتكلموا عنه النهارده، شهرته وصلت استراليا وأمريكا لأنه "ملك الغابة" فعلاً. بعض القبائل كانت تجله لدرجة العبادة مش بس التبجيل!
الناس اكتشفت موته بسبب زئير حزين مفاجئ الساعه ١١ ونص بالليل في منطقته.. ستاته بيصوتوا عليه كأنه بني آدم بالظبط!
في ناس بيقولوا هايتحنط، وناس بيقولوا هيتعمل له تمثال، لسه محدش عارف، لكن المؤكد إنه أشهر أسد افريقي في التاريخ.. بلا منازع.